သူတို့အတွက်၊ ငါတို့အတွက်

M-Media: ကဗျာ.

# သူတို့အတွက်၊ ငါတို့အတွက် #
==================
ဧပြီ ၈ ၊ ၂၀၁၅
M-Media
အိမ်ဝေးသူ(KZ) ရေးသည်။

ဘယ်လက်နဲ့ တစ်ဆုပ်ကြဲလို့
ညာလက်နဲ့ တစ်နိုင်သိမ်းကြတယ်။
သိုးရေခြုံဝံပုလွေတစ်သိုက်ရဲ့
“တပ်ပိုင်မြေ”ဆိုင်းဘုတ်တွေအောက်မှာ
မေတ္တာရှင်ပြည်သူတို့ လှံစိုက်ခံကြရတယ်။

ကျွန်းသစ်တွေ သိပ်ကောင်းတယ်။
(ပြည်သူအတွက် မဟုတ်ပါကွယ်)
သဘာဝဓာတ်ငွေ့တွေ သိပ်ကောင်းတယ်။
(ပြည်သူအတွက် မဟုတ်ပါကွယ်)
ရွှေတွင်းတွေ သိပ်အထွက်ကောင်းတယ်။
(ပြည်သူအတွက် မဟုတ်ပါကွယ်)
x
ခရီးသွားဝင်ငွေတွေ တိုးလာတယ်။
(ပြည်သူအတွက် မဟုတ်ပါကွယ်)
ရင်းနှီးမြှုပ်နှံမှုတွေ တိုးလာတယ်။
(ပြည်သူအတွက် မဟုတ်ပါကွယ်)
ပြည်ပကူညီငွေတွေ တိုးလာတယ်။
(ပြည်သူအတွက် မဟုတ်ပါကွယ်)
x
သောကတွေ များသထက်များလာတယ်။
(အဲ့ဒါ ပြည်သူ့အတွက်ပေါ့ကွယ်)
ဆင်းရဲတွင်းတွေ နက်သထက်နက်လာတယ်။
(အဲ့ဒါ ပြည်သူ့အတွက်ပေါ့ကွယ်)
အနာဂတ်တွေ ပျောက်ဆုံးမတတ်ဖြစ်လာတယ်။
(အဲ့ဒါ ပြည်သူ့အတွက်ပေါ့ကွယ်)
x
မီးလောင်ဗုံးတွေ သုံးလို့ကောင်းတယ်။
(အဲ့ဒါ ပြည်သူ့အတွက်ပေါ့ကွယ်)
အကျဉ်းထောင်တွေ တိုးချဲ့ထားတယ်။
(အဲ့ဒါ ပြည်သူ့အတွက်ပေါ့ကွယ်)
အမုန်းတရားတွေ မီးရှို့ ထားတယ်။
(အဲ့ဒါ ပြည်သူ့အတွက်ပေါ့ကွယ်)
x
တစ်ဦးတစ်ယောက် ကောင်းစားဖို့
တစ်စုံတစ်ယောက်က အနစ်နာခံရရင်
(ဖြေသာတယ်…ဖြေသာတယ်…ဖြေသာတယ်)
လက်တစ်ဆုပ်စာလူနည်းစုအတွက်
သန်းခြောက်ဆယ်က ပေးဆပ်နေကြရဦးမယ်ဆိုရင်
(ရင်နာတယ်…ရင်နာတယ်…ရင်နာတယ်)။။။

——————-
အိမ်ဝေးသူ(KZ)
——————-

မှတ်ချက်။
မျက်မှောက်ကာလ မြန်မာ့နိုင်ငံရေးအကြောင်းကို ပြောရလျှင် မြတ်ဗုဒ္ဓဖြေကြားသော ကောသလအိပ်မက် ၁၆-ချက်မပါဘဲ မပြီးနိုင်ဟု ဆိုရမလိုပင် ဖြစ်နေပေပြီ။ အလျဉ်းသင့်သောကြောင့် ကောသလမင်း အိပ်မက် ၁၆-ချက်မှ အမှတ်စဉ်(၈)ကို
ကိုးကားတင်ပြလိုက်ပါသည်။

အိပ်မက်အမေး။
(အိုးငယ်ချည်းနှီး၊ အိုးကြီးရေလျှံ၊ အိုးကြီးကိုပဲ၊ ရေဆွဲလောင်းပြန်)
ရေမရှိသော အိုးတို့ဖြင့် ခြံရံအပ်သော ရေပြည့်အိုးကြီး တစ်လုံးကိုမြင်ရ၏။
လူတို့သည် အရပ် ၈ မျက်နှာမှ ရေကို ယူလာကြ၍ ထိုရေပြည့်အိုးကြီးအတွင်းသို့သာလျှင်
လောင်းထည့် ကြ၏။ လောင်းထည့်သော ရေတို့သည် ပြည့်လျှံ၍ ကျကုန်၏။
ဤသို့လျှင် အဖန် တလဲလဲ ရေပြည့်အိုးသို့သာ လောင်းလျှက် ရေမရှိသောအခြံအရံ
အိုးတို့ အတွင်းသို့ကား မည်သူမျှ မလောင်း မထည့်ပဲ နေသည်။

အိပ်မက်အဖြေ။
(ဆင်းရဲသူများ၊ ၀တ်စားမကျန်၊ အခွန်တွက်၊ နှိပ်စက်ငွေတောင်းခံ)
နောင်အခါ မကောင်းသော မင်းတို့ လက်ထက်၌ မင်းနှင့်တကွ လူတို့ တရားပျက်ကွက်၊သြဇာညံ့ဖျင်း၊ ဆင်းရဲခြင်းသို့ ရောက်ကြကုန်လတ္တံ့။
ထိုအခါမင်းအစိုးရတို့သည် ဆင်းရဲသားတို့အား မင်း၏ အကျိုးစီးပွား အတွက်ကိုသာ လုပ်ကိုင်စေအံ။ ဆောင်ရွက် စေအံ့။ ထမ်းရွက်စေအံ့။ သို့ဖြစ်ရကား မင်းတို့၌သာပြည့်စုံ အကျိုးခံစားကြရ၍ ဆင်းရဲသားတို့မှာ ရေမရှိသော အိုးတို့ပမာတစုံတရာမရှိ ငတ်မွတ်
ခေါင်းပါးခြင်းသို့ ရောက်ကုန်လတ္တံ့။